سلم نفسك يا مواطن الـ”كيربي” محاصر…!

محمد خلف الشمري

الخبير:” الحق يا حج سلم نفسك المكان محاصر”!
الشايب:” اهب يا وجه وش العلم ياخبير الدجه”؟
الخبير:” سالخير على البنور والغائب يعلن حضور، ليه كده ياحج هي وصلت لشتيمه، مش قايلك اي حاجه ده انت طلعت فوق الفظيع، وهو الواحد مايعرفش يهزر معاك”؟
المعاق:” امسحها فيني ياخبيرنا، ولا تلوم الشايب، تراه واصل حده لان قهوجيه هرب البارح وهو نايم، وعلشان جذي يا ليتك تقول موضوع اليوم، وتخلصنا من سالفة المعاتب والهزار”؟
الخبير:” أبشر يا طويل العمر، يطول عمرك، ويزهزه عصرك، وينصرك على من يعاديك… الخبر بيقول 5000 دينار غرامة غرفة الكيربي على السطح، والكلام منقول من لسان الباشمهندس رئيس قسم إزالة المخالفات في فرع بلدية محافظة العاصمة.
وأوضح سعادته أنه عند ضبط المخالفة من قبل الجهاز الرقابي المختص يحرر محضر، ويتم توجيه إنذار لمالك العقار تحدد مدته حسب نوع المخالفة، إما للإزالة وإما لتصحيح الأعمال المخالفة ورد الشيء إلى أصله”.
الشايب:” ما شاء الله، وكأن هذا اللي ناقصنا ما ادري هي خلصت مشاكلنا، وشوارعنا صارت سنعه والزحمه اختفت، والمستشفيات مافيها ولا وافد، والحرامية والمزورين كلهم بالسجن زجوهم؟
ويالله من فضلك البدون انحلت مشكلتهم، وكل شي رخص، والماء والكهربا ببلاش، والقروض طاحت، والتعليم تسنع، والبنزين رد سعره نفس قبل، والعيال والبنات تزوجوا وخلفوا صبيان وبنات، والرياضة صارت بأعلى المراكز، والجماعة بعد حل مشاكل الكويت كلها تفرغوا لتجاوزات صناعية الشويخ وميناء عبدالله وامغره والصليبية، وتجاوزات علية القوم على الشاليهات البحرية والمزارع والمناقصات”؟
المعاق:” بس خلاص ارحم نفسك ياحجي… لا… لا… لا تقول ياخبير، واللي يرحم والدينك، انت تتكلم جد او السالفة مطلعها من جنبك، معقول الهجوم القادم على الكيربي اللي بسطوحنا”؟
الخبير:” ياعم الأمور، ده جد الجد، وبالصفحة الاولي بالجورنال اللي بين ايديني، والا أقولك خذ الجورنال وشنف آذانا بالخبر المعكر على دين أمي بصبحنا اللي باين انه مالوش ملامح… والله انتم صعبتوا علي، وقلبى معاكم يامواطنين ياغلبانين اوي اوي”!
الشاب:” بعد هالقرار أنا وين أولي، ما تقولون لي وين اسكن في ظل قلة الراتب، وغلاء أسعار الشقق، وطول الانتظار لبيت العمر، ياربي هم معنا والا علينا هم وراهم حاسدينا بكل شي، يعني أنا محصل سكن ورافضه، الكيربي اللي سويته بسطح بيتنا عشان اسكن أنا وزوجتي وولدي ماهو لحمام او للتشمس، يا جماعة الخير هذي حدود إمكانياتي وقدراتي هم وين يبوني اسكن”؟
الرجل:” وهالناس المجتهدة هم وينهم من أهل التجاوزات المخالفة اللي بانين اكثر من ثلاثة ادوار، والا الظاهر متغطية هالبيوت بطاقية الاخفاء، والله غريب امر هالبلد ماعندهم الا المواطن البسيط متشطرين عليه وعلى اللي خلفوه؟
مسألة الغرامة على غرف الكيربي فعلاً مسألة مستفزة ؟ ياحكومه الى متى وانتم تطاردون أصحاب الدخل المحدود حتى في سكنهم الخاص”؟
المتمولس:” أصابني بعينه سهم فتاك … دنقت فذهب السهم مناك”! وفي هذه الاثناء رفع الشيخ زغلول على مسامعنا اذان الظهر.

كاتب كويتي